Tryggvi Gunnarsson

Framboð: 3.-5. sæti

Fæðingarár: 1963

Búseta: Seyðisfirði

Ég heiti Tryggvi Gunnarsson, oftast kenndur við Flatey í Breiðafirði, og stefni á 3ja sætið á lista Framsóknarflokksins í NV kjördæmi fyrir næstu alþingiskosningar. Ég er 57 ára skipstjóri með margskonar reynslu úr atvinnulífinu – sjómennsku, ferðaþjónustu, kvikmyndagerð, byggingarvinnu og sveitastörf. Ég hef glímt við hjartasjúkdóm frá 36 ára aldri og hefur sú reynsla verið lærdómsrík og veitt mér innsýn í kjör og stöðu öryrkja.

Hér á eftir eru mínar helstu áherslur:
Fólk á að geta dregið fram lífið á sómasamlegan hátt á lægstu launum og bótum. Þetta er skýlaus KRAFA.
Samgöngur eru lykilinn að blómlegri byggð á Íslandi, þetta vitum við ÖLL. Tryggja þarf búsetu, heilbrigðisþjónustu, menntun, frelsi og almenn lífskjör. Ef þetta væri í lagi hef ég ekki áhyggjur af landinu eða fólkinu sem það vill byggja.
Náttúruvernd, nú í ljósi alvarlegra aðstæðna. Setjum náttúru Íslands og alls heimsins undir sama hatt með skýru almennu regluverki og verndun. Ég hef þó engan áhuga á að opna leyfisbréf í hvert skipti sem ég þarf að fara undir ÆÐARKOLLU.
Ný stjórnarskrá? Upp úr skotgröfunum, finnum sameiginlegan grundvöll, tökum afstöðu og klárum SAMTALIÐ.
Evrópusambandið? Upp úr skotgröfunum, ræðum kosti og galla, heiðarlega, tökum afstöðu og út af borðinu með ÞRASIÐ.
Kvótakerfið, klofin þjóð! Upp úr skotgröfunum og lögum ástandið með öllum tiltækum ráðum. Þjóðin á fiskinn í SJÓNUM.
Barnavernd. Ég styð heilshugar nýjar áherslur sem barnamálaráðherra hefur verið í farabroddi með undanfarið, það starf verður honum ætíð til sóma. „Það minnsta sem þú getur gert er að koma vel fram við börn“ (Vigdís Grímsdóttir). Við erum því miður allt of mörg sem þekkjum annað.

Ég er í sambúð með Elfu Hlín Sigrúnar Pétursdóttur og eigum við fimm ára gamla dóttur. Ég hef verið búsettur á Seyðisfirði síðustu 6 ár en ræturnar vestur eru mjög sterkar og fyrirferðarmiklar í mínu lífi. Ég sakna birtunnar, þrái frelsið og víðsýnið. Ég á hús í Stykkishólmi og gæti hæglega tekið mig upp með konu og barnið. Mig langar oft heim.

Pólitík er stundum leiðinlegt argaþras sem er mikilvægt að breyta þannig að hún fæli ekki frá hinn almenna kjósanda. Okkur vantar alls konar fólk með nýjar áherslur og við þurfum skapa rými fyrir það. Ég þakka stuðninginn, vil vera ferskur og öðruvísi þingmaður. ÞAÐ MÁ.

Ég er á Facebook, síminn minn er 893-0000 og netfangið tryggvi@flatey.is, endilega hafið samband og kynnumst betur.
Kveðja góð
Tryggvi Gunnarsson Flateying í 3ja sætið.